LALPA THAWHLEHNA - NUNNA THAR - Jacky Chhakchhuak

 (Mt. 28:1-10; Mk. 16:1-8; Lk. 24:1-12; Joh. 20:1-10)

Chhandamna famkim kan chan theihnan Lal Isua chu Zawlneiten an hrillawk ang ngeiin Bethlehemah tlawm takin alo piang a, thuhnuairawlh leh inngaitlawm takin, sawichhiatna leh beihna tam tak karah a hun hmang zovin Pathian sawichhia a puh niin thiamloh chantir a ni a, khawvel sualna zawng zawng a phur a, nghaisaka awmin vuak thitlin anih hnuah kraws lerah khai kan niin alo thi ta a ni. Lal Isua kha thlanah zalh a ni a, Ama sawi ang ngeiin a ni thum niin a tho leh ta a ni. A taksa kha tho leh ta lo nise chuan mihringte tan thawhlehna a awm lo anga, a tawrhnate chu a thlawn mai dawn si a. Fapa anihna-in tlanna hna a rawn thawk a, Pathian Mi Thianghlim anihnain ropui takin a tho leh ta a ni. Lal Isua thihna, phumna leh thawhlehna hian awmze ril thuk tak, chatuan nunna kan neih theihna tur a keng tel a, chumi pawimawhnate chu tihlan kan tum dawn a ni.

LALPA THU, CHANCHINTHA CHU: 

Zirtirte hnenah Lal Isua a inlar khan Pathian Lehkha Thu an hriat nan an thinlung a tifing a, he’ng thu hi an hnenah chuan a sawi ta a; “Heng hi ka thu kha a ni, Mosia Danahte, Zawlnei Lehkhabuahte, Fakna Hla Buahte ka chanchin ziak apiang a lo thlen turzia in hnena ka awm laia ka hrilh thin che u kha,” (Luka 24:44). Lalpa chuan chanchintha Jerusalem atanga chhuak a, hnam tin hnena an hril tur thute chu a hrilh hlawm a; “Krista chuan hrehawm a tuar anga, ni thum niin mitthi zing ata a tho leh anga, ama hmingin simna thu leh sual ngaihhnathiamna thu Jerusalem khuaa tanin, hnam tin hnenah an hril ang,” tiin” (24:46-47). 

Lalpa sawi lawk ang ngeiin thlamuantu Thlarau Thianghlim an chungah lo thlengin, Jerusalem khua atang chuan Chanchintha chu hril tanin a awm ta ngei a, Petera leh a apostle dangte chuan Lalpa kohhran chu Tirhkohte 2:38 ah Lal Isuan piantharna leh Pathian ram luah theihna tura kan tih tur alo sawite chu a takin tih famkim alo ni ta a, mi 3000 lai belhchhah niin Lalpa Isua hmingin a thihna, phumna leh thawhlehna anpuiin tui leh thlarau baptisma an lo chang ta hlawm a (Tirhkohte 2:38; Rom 6:3-5). Chu chanchintha ngei chu Pathian fa kan nih a, a roluahtu kan nihna tur leh chatuana nunna kan neih theihna tur atana Lalpan Amah leh mihringte inkara inremna thuthlung a siam chu alo ni ta a ni (Rom 8:16-17).

KAN THO LEH ANG:

Tirhkoh Paula chuan, “Nimahsela Krista chu mitthi zing ata kaihthawhin a awm tak zet a ni, muhilte thawh hmahruaitu a lo ni ta”  (I Kor. 15:20) tiin Korinth khua a kohhranhote hnenah alo sawi a. Lal Isua thawhlehna chu thawh hmaruaitu alo ni ta a, Amah a tho leh ang ngei khan keini pawh kan thih hnuah kan la tho ve leh dawn a ni tih min hrilhna a ni. Tirhkoh Paula chuan Rom khua mite hnenah “Chu Isua chu kan sual avangin mantirin a awm a, thiam kan channa turin kaihthawhin a awm bawk a” (4:25) alo ti a. A thawhlehna anpuiin thlarauva nunthara awmin chhandam mek kan lo ni ve thei ta a ni.

Kan Lalpa chu kan sualte phurin alo thi tawh a, Tirhkoh Pauala chuan a thi leh tawh dawn lova, thihna chuan ama chungah thu a nei tawhlo a ni tih min hrilh a ni (Rom 6:9). Zirtirte chuan Lalpa an hmuh khan hmuithla/thlarau emaw an ti a, mahse Lalpa chu taksa pu ngeiin, thlanah khan a taksa peng engmah hnutchhiah awm lovin a tho leh ta zawk si a, “Tin, ani chuan an hnenah, “Engati nge in mangan? Engah nge in rilruah rinhlelhna a lo awm?  Ka kutte, ka kephahte hi en rawh u, hei keimah ngei kha ka nih hi! Mi dek ula, en rawh u; ...,” a ti a (Luka 24:38-39). Chutia an khawih a, an finfiah hnu chuan Lalpa ngei kha a tho leh ta a ni tih an chiang ta a, ahnuah phei chuan Lalpa chuan sangha a ei ve nghe nghe a ni tih kan hmu bawk a ni.

Chutiang zelin keini pawh kan la thi vek dawn a, kan thil tih ang zelin Lal thutphah hmaah rorelsakin kan la awm ang. Lalpa ngei chu au thawm nen, vantirhkoh chungnungber aw nen, Pathian tawtawrawt ri nen alo thawh hunah chuan Lalpaa muhil tawhte chu an tho hmasa anga, chumi hnuah keini nunga lo la awm rengate pawh chu taksa danglam puin Lalpa hnenah chhum zingahte khian lakchhohvin kan awm ve dawn a ni. A va ropui dawn tehlul em! Lalpa chu fakin awm rawh se. Lalpaa mitthi a tihte chu Tirhkoh Paula’n, “In zinga Kristaa baptisma chang apiangte chu Krista chuan in inthuam tawh si a” alo tihte chu anni dawn si a.

-------------------------------------------