RAH THA (Thuziak tawi)

Pathian Lehkhabu Thianghlim hi Kristiante tan chuan kan Nun kawng chaw, nitin a kan ei leh in tur, kan thlarau tan chaw tha min petu, nunkawng dika min hruaitu a ni a. A chhiar tam apiang an nun a ngil thin.

   
Lalpa Kohhran tana kan thawh chhuah hian Vana ro kan khawl khawmna anih ve miau avangin kan duh loh leh peihloh ngawt theih hi a ni hran lo! 

    Lalpa Thlarau malsawmna kan dawngin kan chang thin a. A lawmawm thin hle mai. Amaherawhchu chu kan Thlarau chan chuan kan nitin nunah rah tha a chhuah leh siloh chuan hmasawnna lam aiin kan hnungtawlh zel tihna a ni a. Chutiang anih avang chuan keimahni a Pathian Thlarau hnathawh lo lang thinte hi kan nitin nuna chhelna leh rinawmna, tih hram hramna nun min petu ni thin se a duhawm hle.

    Kohhran chu engtiklai pawha hlim reng kan ni thei lova. Mihring taksa kan la put miau avangin ngui chang leh chauh chang ni kan nei lo thei lova. Amaherawhchu chung kan chauh chang ni chuan Lalpa Biak In hlat phah nana kan hmang anih chuan kan tisual hle dawn a ni. Tirhkoh Paula chuan ‘ka chakloh apiang hian a ni ka chak thin ni’ alo ti a, a ropui hle mai. Kan chaklo lai hian tih hram hramna nun kan neih angai thin, chu chu Thlarau rah pakhat a ni.

    Lal Isua chuan Theipui kung thang duang zet mai, a rah chhuah hun tura rah chhuah miahlo chu a hau hlum hmak a ni tih kan hre vek awm e. Keini pawh kan fimkhur angai hlein ka hria, rah tha chhuah tur kan nihlai hian rah chhuah kan neih leh siloh chuan Lalpan min hawisan maiang tih pawh a hlawuhawm hlein ka hria. Rah tha chhuah thei turin i bei zel ang u.