KAWNG AWLSAM A NI LO - Jacky Chhakchhuak

Tunlai khawvel changkanna hian kawng awlsam/tihdan awlsam zel a hringchhuak mek zel a. Tunhma deuh kha chuan zualko kal tur intirhte kan hre fo thin, nula leh tlangval inngaizawngte ramhla taka awmte phei chuan lehkhate inthawnin an hmuh leh inchhanletnan hun rei tak a duh thin a, kan sawi vek seng lovang. Tunah erawh chuan mahni in lum atangin thil tamtak a tih theih ta ! Kutphah tiat emaw a aia liante  hmang hian kan bazar tawh a, nula/tlangval kan inrim tawh a, khawvel tukverhah kan dak zuai zuai tawh mai a ni ! TV lah nise en sen loh channel a awm tawh a, mahni awmhmunah pawh alo Kristian theih ta viau mai! Sermon/Pathian thu a rawngbawlna tamtak pekchhuah thin a ni a, chumi en a inkhawm kher angailo tite kan lo awm ta zel a, mahni awmhmunah hian kan lungawi tlang ta hle niin a lang. Biak In thutna a khat ta pharh a, kohhranah revival hmuh tur a tlem ta. Kan pi leh puten an hunlaia kohhran an hlim theih thinzia an sawi fo thin pawh hi an thiamawmloh hran loh ka ti, achhanchu khatih hunlai khan tunlai khawvel changkannain a tihbuai ve loh avangte pawh a ni mahna le. An thinlung zawng zawngin Lalpa an fakin an chawimawi thin, chu chu Lalpa malsawm duh zawng tak alo ni si. Tun hunah ngei pawh hian kan thinlung zawng zawng a maicham hmaa Lalpa kan fak anih chuan a Thlarauvin min awmpui fo thin reng a ni. Mahse chutiang a thlen theihna tur erawh chuan kawng awlsam a ni hauh silo! Biak In (Lalpa) aia thlahlel leh ngaih pawimawh kan ngah avang hian kan Pathian thikthu chhia chuan min hnaih lo mai thin alo ni a. Ani kan hnaih chuan min hlat chuang hauh silo. 

Lal Isua hunlai reng pawh khan Vanram panna kawng hi kawng awlsam anihlohzia Amah Lal Isua ngeiin vawi tam tak a sawi a. Tunlai khawvelah ngat phei chuan ava harsa lehzual dawn tehlul em! Chutihlaiin, awlsam taka Pathian ram luh dan kan la inzirtir thin hi chu a Pathian Thu lo hlein ka hria. Baptistu Johana’n Lal Isua a baptist khan Thlarauvin thlalerah ni 40 leh zan 40 thlemna hmachhawn turin a hruai a. Chumi hnuah chuan Gallilee ramah rawgbawl a tan ta a. Chuta mipuite hnena Pathian ram a luh chu thil awlsam anihlohziate chu, sawizau a, rilrua vawn reng a tula ka hriat avangin kan tarlang dawn a ni.

1. Pathian leh sum (Matt. 6:24; Lk. 16:13) : 

Lal Isuan mipuite hnenah heti hian a sawi “Tuman hotu pahnih rawng an bawl kawp thei lo; pakhat huain pakhat an duh ang; anih loh leh, pakhat tanin pakhat an hmusit ang. Pathian leh sum rawng in bawl kawp thei love”. Lal Isua hunlai khan sumdawnna hmanga eizawng an tam hle a. Sum an ngaih pawimawh em avanga an nitin khawsaka an buai thinnate chu Pathian rawngbawlna nen a inkawp theiloh thu Lalpa hian a sawina a ni ber a. Pathian rawng bawl tur chuan retheih ngam a tulzia a ti lang. Lalpan a duh ber chu amah aia ngaihpawimawh dang reng neih loh hi a ni. Kan nunah hian hmun pawimawh ber chan a duh reng a. Chutihlaiin keini chuan kan eizawnna chhuanlamin Lalpa min beiseinate kan tihlawhchham fo thin. Lal Isua aiin kan eizawnna kan ngai pawimawh zawk ang tih a hlauhawm hle, chuti anih palh hlauh chuan Lalpa chibai kan buk venate chu a thlawnin a thamral mai dawn a ni. Inngaihzawn lai leh nupui/pasal neih laia kawp kan duhloh ang bawkin Lal Isua hian kawp a duh bik hauh lova, Amah chauh ngai pawimawh turin min duh a ni. Chu chu a hnen kan thlen theihna tur a ni a, chutihlaiin a hnen kan thlenna tur min daltu a nih ve thei bawk. Mt. 6:25 ah chuan eitur aiin nunna a hlut zawkzia thu min hrilh a, heihi kan vawn reng a tul khawp mai, kan nunna turin i tlanchhuak ang u! Lal Isua chu kan nunah lo Lalber sela, engmah rengin luahlan lul suh se. 

2. Ka hre ngai lova che u (Matt. 7:21-23; Lk. 13:25-27) : “Lalpa, Lalpa’ mi ti nazawng chu van ramah an lut lo vang a; ka Pa vana mi duhzawng titu erawh chu an lut ang. Chumi niah chuan mi tam takin, ‘Lalpa, Lalpa, i hmingin thute kan sawiin, i hmingin ramhuaite kan hnawtchhuakin, i hmingin thil mak tam takte kan ti thin lovem ni,’ an la ti ang. Chumi hunah chuan, ‘Nangni thil sual titute u, ka hre ngai lo va che u, ka hnen ata kal bo rawh u,’ tiin anni chu ka la hrilh ang,” - Matt. 7:21-23. Helaia Lal Isua thusawi hi a har hle dawnin ka hria! Hemi thuah hian nang leh kei pawh kan tel ve thei a ni tih hi kan hriat a tul khawp mai. Tamtak hi chuan Lalpa hmaah hian thiamthu sawi tur kan la ngah viau ta ve ang! Lalpa duhzawng chu eng nge ni? tia kan ngaihtuah fo a tul hle mai. Lalpa rawngbawl anga lang reng chung siin Lalpa duhdan piahlamah mahni tha leh duhdanin kan kal fo thei tlat a ni. Kohhran rawngbawlnaah, department hruainaah a ni emaw, mahni phak ang tawka kan lo inhman ve nate hi chhuan tur reng a awm lova, Lalpa Kohhran tan kan thawk a ni ve mai zawk. Pastor/Upa/Department hruaitu ka nihna hian vanram min thlen dawn lova, Lalpa duhzawng ka tihna zawk hian vanram min thlen dawn a ni. Kohhran hotua tan duh chu hnathawh tha duh anih avangin a tha em em a (I Timothea 3:1), chutihlaiin tamtak chuan nihnain a ken tel kan hre zo tawhlo fo thin. Hun rei tak nihna kan lo chelh tawhte, hmana kan hlimna leh lawmnate hi Lalpa hmaah kan la chhuanpui maiang tih ava hlauhawm em! Kan tun hun zel hi a pawimawh si avangin, Lalpa rawng kan bawl kan lo inti ve viau tawh si laiin Lalpa mi hriat kan lo ni lovang tih a hlauhawm hle. Lal Isua hming hi thiltihtheihna anih tlat avangin, Lal Isua hunlai ngei pawh khan a hminga ramhuai hnawtchhuak an awm a ni tih Marka 9:38 ah kan hmu a. Johana chuan anmahni an zui ve loh avangin an khap thu Lalpa hnenah a hrilh a, mahse Lal Isua chuan khap lo turin a ti a ni. Chutiang zelin, mi tamtakin Lal Isua hming ngei pawhin thilmak tam tak anla ti fo vang, kan chian ngai erawh chu Lalpa hnungzuitu/ a Thu zawmtu a ni em? tih zawk hi a ni. Anlo nilo anih pawhin kan lo buaina vak tur a awm lo, Amah Lal Isua ngeiin a phal tlat a ni. Thil tih mak leh chhandamna hi a dang daih a ni tih kan hriat a tul hle. Lal Isua hminga thilmak tih hi chhandamna a ni lova, chhandamna erawh chu a dang daih thung. Hengho hian Lalpa hmaah sawi tur anla ngah viau ta ve ang! Mahse Lalpa chuan alo hre dawn hauh silo! Vanram kan panna kawng hi kawng awlsam a ni dawn hauh lo.

3. Kawngka Zim (Mt. 7:13-14; Lk. 13:24) : Tunlai khawvel changkang tawh takah hian hun khawhralna tur a tam ta hle. Nuam kan tih zawng apiang hi sual a ni zel mai si a, ava buaithlak em! Mt. 7:13-14 ah chuan Lal Isuan Boralna kawngka leh a kawng a zau thu min hrilh a, he thu hi kan chhut ngun a pawimawh hle. Kawngka zau leh kawng zau in a sawi chu nuam lampang hlir a ni. Hmun nuam tak, intihhlimna pawh tam tak awmna hmun kawng zau tha em em ni bawk si chu a pan pawh a nuam anga, a kal pawh an tam thin hle ang. Chutihlai erawh chuan kawngka zimah chuan mi an leng tam dawnlo tih a hriat a, a kawng chu a chep em em a, a kawngka a zim bawk si avangin a kawnga kal pawh a tlem hle dawn a ni. Kawngka zim leh kawng chep hian hrehawmna leh harsatna a kawk ber a, nunna kawngka anih miau avangin Lalpa mite tan lo chuan a kawng mai pawh kal ngaihna awmlo khawp hiala chep a ni si a! Helaia Lal Isua thusawiah hian Pathian rama luh hi chuti maia awlsam a ni lo tih a chiang hle awm e. Luh inring ve tak tak site pawh an lut lo nual dawn a ni. “Tupawh a nun thlahlel chuan a hloh thin; tupawh he khawvelah hian a nun ngaitlawm chuan chatuana nunna tur a vawng reng ang” tiin Lal Isuan John. 12:25 ah a sawi kan hmu a. Khawvela nun thlahlel leh duham taka hmangte tan chuan kawngka zim a luh chu a har viau dawn a ni. Tin, Johana 14:6 ah Lal Isuan Kawng leh Thutak leh Nunna a nih thu leh Amaha kal lo chu tumahin Pa hnen an thlen loh tur thu kan hmu leh a. Lal Isua hi kan hriatchiana, a thupekte kan zawm hian Kawngka zimah chuan kan lut thei chauh dawn a ni. Mahni remhriat dan leh tha tih dana luh lo tum ve ngawt chi a ni lo, a zim lutuk tlat! Tunlai khawvel changkannain a kentel Kawng awlsam hi rinnaah lehzel kan la lut tan ta hi a pawi hle. Lal Isua hi Lal leh Chhandamtuah ring la chhandam i ni ang tihte hi a va awl tehreng em aw..! Pentecost Kohhran huangchhungah ngei pawh kawng vanram short cut lama kal tum kan lo awm tan ta..! Thilmak a ni hran love, kohhran pawnlam leh rinna dang rengin a tihbuai theihloh Pentecost mite chu hmelma pa chuan thiam tak maiin a chhung lam a tangin min bei ta mauh mai le! Juda hotu pakhat Nikodema’n Pathian ram luh theihna turin eng nge a tih tur tih Lal Isua a zawh khan ring la chhandam ini ang a ti hauh lova, “Mi tupawh tuiah leh thlarauva an pian loh chuan Pathian ramah an lut thei lovang” (- Johana 3:5) tiin alo chhang ta zawk a. Lal Isua vana a lawn atanga ni 50-na niah chuan Pathian ram luhna alo sawi lawk tawh chu a takin Zirtir Petera  chuan Tirhkohte 2:38 ah a takin alo lantir ta a, an sualte simin Lalpa Isua hminga tuia hnimphum ngeiin baptisma an chang a, Thlarau Thianghlim a an khah bawk thu kan hmu a ni. Tui baptisma chu mihring (rawngbawltute) tihtur a ni a, Thlarau erawh chu Lalpa lak atanga kan dawn tur a ni thung. Mt. 3:11 ah Baptistu Johana’n alo sawi lawk daih tawh a ni.  Kawngka zim a lut turin kawng chep takah kan kal tan mek tihna a ni. Kawngka zima lut tur chuan felna zawng zawng kan hlenchhuah ala ngai a, tlukna tur ala tam avangin  nunna kawngka zim kan thlen hma zawng fimkhur takin Lal Isua en reng chunga kan kal angai a ni.

4. In nghet leh nghet lo (Mt. 7:24; Lk. 6:47-49) : Lal Isua chuan a thu hria a zawm apiangte chu mifing lungpui chunga in satu nen a tehkhin a. Chu in chu ruahsur, tuilian leh thlite chuan nam sawk sawk mahsela a chim ve ngai lo. Lal Isua khan chhandamna hna thawk tura khawvela alo kal lai khan a rawngbawlna tamtakah Pathian ram chanchin a sawi nasa hle a. Pathian ram lut tura kan tih tur leh tihlohturte nen lam a sawi a ni. Tuna ka tarlante hi chu thenkhatte a ni chauh zawk a. Nikodema hnena Pathian ram luh theihna a sawite leh tehkhin thu hmanga a thusawi zawng zawngte kha a ngaithlatute leh rinna a lo hretute hian kan zawm a duh hle a. Lal Isua thusawi apiang kha hmangaihnaa sawi anih avangin a zawmtute chu mi hamtha anni anga, engmah rengin a ti chhe thei dawnlo a ni. Chutihlaiin, a thu zawmlotute erawh chu ruahsur, tuilian leh thlite chuan awlsam takin a ti chhe mai thin. Kohhran (Krista Taksa) hi kalpah mai mai turin Lalpan min pe lova, kan Thlarau nun chawmtu leh chhandamna kawng min kawhhmuhtu atan min pe zawk a ni. Lal Isua tana rawng kan bawlna hi a te lua a awm lova, keimahni tawkah theuh Lalpa tana kan inpek a, a taksa kan ngainat a, a thu kan zawm anih chuan mifing lungpui chunga insatu kan ni ve mai dawn a ni. Mahse, chutiang chu tunlai khawvelah chuan a har tawh hle niin a lang! Inkhawm aia nuam leh thlakhlelh hi kan ngah tawh a, Kohhran hi kan kalpah vel mai mai tawh a ni ber mai. Lalpa mi chuan a kohhran a ngaina thin a, tawngtainain Lalpa a dawr a, a thu chhiarin a ngaihven fo thin. Ding nghet ila, Lalpa tan i inpe thar leh ang u. Chuti anih loh a, phur chang chang a Lalpa rawng bawl kan nih vaih zawngin kan insak hi ala chim hlauh dah ange! Tuilian, ruahsur leh thlipui pawhin a a tihchhiat theihloh tur khawp a rinawmin Lalpa tan i ding ila, Pathian mite inkhawmna hmunah i kal tam ila, kan damchhung reilote tana hun zawng zawng hmang ral mai lovin, kan thlarau thi thei tawhlo tur chatuan daih tur tan hian i thawk tam zawk ang ila, chu chu nakina kan lawmna tur ala ni ngei ang. Lalpa mi chuan  nghet takin in a sa a, Kohhran zirtirna leh rawngbawlna a ngai pawimawh thin.

Lal Isua Krista hi tunlai khawvelah hian lo piang ta se, amah chibai buk hmanlo a buai fe fe chu kan tam ta ve ang! Kohhran hi kan thlarau damna a ni tih hre reng chung siin, kan nitin khawsak buaina hian min uai rit tawh zawk a. Lalpa tana inpek aiin keimahni inhai vurna tur lamah kan buai sung sung tawh a ni ber. Nula Thianghlim sawm (10) tehkhin thu ang mai khan Lalpa chu kan rin loh lai takin alo la lang ngei dawn si a, chumi atan chuan kan khawnvartui (kan thlarau nun) hi kan tuaithar reng a tul hle a ni, chuti anih loh chuan Lalber lokal hunah kan lo muthlu in kan tlinglo hlauh ang tih a hlauhawm hle. Lalram Van Jerusalem thar kal thleng tur hian kawng lakah harsatna leh buaina tam tak kan tawk fo dawn a, chutimaia awlsam anih loh avangin Lal Isua en reng chungin Kohhran bel tlat ila, tawngtaina nun nen Lalpa kan hmuah a tul hle a ni. Lalpan malsawm rawh se.