FAINA

- Ziaktu: Jacky Chhakchhuak

‘Faina’ kan tih hian mihringte nunah hian hmun pawimawh tak mai a luah a, faina hi thil tih satliah mai a ni lova, nitina kan nunpui tur ‘nungchang tha’ (good habit) ah chhiar tel chi zawk mah a ni. Kan dam khawhchhuah theihnan nitin tui leh chaw kan mamawh ang chiah hian ‘Faina’ hi kan nitin mamawh a ni ve bawk. Damrei tur chuan hriselna tha kan mamawh a, hriselna tha nei tur chuan faina kan nunpui angai thung. Faina hlenchhuah hi Khawtlang hruaitute leh midangte kuta dah mai chi a ni hauh lo mai a! naupang atanga tar thlengin mitin mawhphurhna a nih avangin ti tur bik an awm hran chuang lo. Mawhphurhna hlen chhuah chu mi puitlingzia anih ang ngeiin puitling turin rahbi thar kai a tul hle.

Faina pawimawhzia hi sawi vek sen a ni lova, kan theih chen chen kan sawi dawn a ni. Sikul pakhat Classroom-ah hian faina chungchang slogan hetiang hian alo intar ka hmu a, ‘Pick Up and see the change’ tiin. Mizo tawng chuan ‘Chhar la, danglamna thlen rawh’ tiin letling ta ila. A awmzia chu Bawlhhlawh kawng dung emaw kan hmaa a awmna tur nilova kan hmuh reng rengin kan chhar a, a bawmah kan thlak chuan khalai hmun kha then thianghlim alo ni tawh anga, chu chuan danglamna a siam dawn a ni. Thil reng reng a awmna tur hmuna a awmloh chuan bawlhhlawhah alo chang mai thin. Chutiangzelin bawlhhlawh siamtute chu mihringte kan nih ang bawkin a thenfai hna pawh kan tihtur a ni ve bawk. “Fai hi Pathian an teuhna ber a ni” tih thufing hi faina chungchangah chuan kan sawi hmaih hauhloh tur a ni a. Pathian thianghlim anih ang ngeiin a hnungzuitute pawh kan thianghlim ve tur a ni. Kan fai chuan kan lo hrisel anga, chhungkaw tin kan lo hrisel chuan kan ram/ kan khua alo hrisel ang, chu hriselna chuan chhungkaw tinah hlimna min thlen anga khawtlang boruak pawh ati muanawm hle dawn a ni.

Faina hlenchhuahna kawngah hian mitin hian tihtur kan nei theuh mai a. A hmasain mipuite/mimal tinten-a faina kawnga hma kan lak ve theihna tur hrang hrangte lo tarlang ila;

1. Bawlhhlawh reng reng a bawma paih.

2. Tui dahkhawlna chhin phui

3. Ei tur reng reng tho bawm theih lohna tura chhin phuite.

4. Tui tling hman tlak tawhloh then thianghlim/then fai.

5. Nitin mumal taka inbual fai a, thawmhnaw fai hak fote.

6. Kuhva eina sen leh chinaite, sahdah/khaini hmuam hnu bangah emaw khawlaiahte chhah lohte.

7. Kawng sir leh khawlaiah zun leh ek thlahdahlohte

8. Ui leh Ar chhuah lohte.

9. Khawtlang bungrua/thil (Public property) hetiangin: Rel Station, Zun in, PHC, etc dim dawi taka enkawla, ti baltu nilova thenfai fote.

10. Kawng dung emaw kawng sirah pawh nise bawlhhlawh (thil eina kawr) kan hmuh angte chhara a bawma paihte.

Heng bakah hian sawi tur tamtak a awm thei awm e. Khawtlang hruaitute tana faina hlenchhuahna tur kawnga mawhphurhna leh tih tur pawimawhte lo tarlang leh ila:

1. School/Office/Vengchhung faiber lawmman kum khatah vawi khat tal pek thin nise. (Hemi tur hian kum tirah inspection team din nisela chu chuan kar khat chhung atan chauh nilo kum tir atangin kum tluanin endik hna thawh thin nise.)

2. Khawtlang mipuite’na faina kawngah hma kan sawn theihna turin ‘Cleanliness Awareness Programme’ hmangin faina pawimawhna khawtlang huapa inzirtirna hun hman thin nise.

3. Faina pawimawhna slogan/sign board pakhat chauh nilo a khat mawi tawkin tar ve nise.

4. Khawchhunga vengtinin Sanitation Body/Committee din nise.

5. Bawlhhlawh paihna hmun bik siam niin, hal ral thin nise.

6. Bawlhhlawh kawngdung luikawr emaw phallohna area a paihte an awmin pawisa fine tir thin nise.

7. Sorkar atanga NREGS Fund lokalte a theih anih chuan khawtlang then thianghlim nan tangkai taka hman nise, hetiangin;

(i) Tui luan kawr (side drain) mumal tak, kawngpui dung leh veng tinah siam nise.

(ii) Khawchhung/vengchhung hnimte samfai thin nise.

(iii) Vengtinah bawlhhlawh bawm rinawm tak dah theuh nise.

8. Ruihhlo tite leh zuarte zawng chhuakin man annih chuan an tih chhunzawm zel tawhlohna turin na taka hremna pek thin nise.

9. Faina chungchangah School tin tan intihsiakna (competition) heng; Essay Writing, Slogan, debate, etc buatsaih thin nise, lawmman tha tawk tak siam nita bawk sela.

Hetianga mimalte leh khawtlangin hma kan lak chuan faina hian mitin rilruah bu nghet takin a khuar anga, tumah inthlahdah leh awm bawlhhlawh reng kan awm lovang tih a rinawm a ni.

Mizoram mai nilo kan khua Bairabi ah pawh hian hun rei tak chhung chu khawtlang huapa vengchhung thenfai hnatlang (Social Work) kan lo kalpui tawh thin a. Kan Prime Minister zahawm tak Narendra Modi chuan Swachh Bharat Mission hnuaiah India ram chu October 2nd, 2019 ah chuan a fai vek tur a ni tiin (Clean India goals) hmachhawp a siam a ni, chumi atan chuan kumin Sept. 1st - 15th Sept., chhung khan India ram school tinah Cleanliness Drive leh a kaihhnawih nei turin sawmna a thawnchhuak a. busyclean.co.uk  a a lan danin tun dinmunah hian France hi khawvela ram fai ber a chhal a ni a, chutih laiin India erawh chu ram tam tak zingah faina lamah chuan kan langpha meuh lo. Khawvela ram tawp berte zingah chhiar tel kan ni hlauh thung! Swachh Bharat Mission hnuaia din ‘Swachh Survekshan 2016’ in khawpui 476 a survey aneihah chuan India rama khawpui fai ber chu Mysore (Mysuru) niin Dhanbad, Jarkhand chu khawpui tawp berah a puang thung. India rama khawpui tawp ber 10 thlan chhuahte zingah Uttar Pradesh state chhunga khawpui panga (5) an tel a. Chutih laiin Sikkim hi State fai bera puan a ni bawk. Mizoram erawh chu kan la langpha meuh lo. Bairabi alo fai chuan Mizoram alo fai anga, Mizoram alo fai chuan a chhunga chengte ngei pawh kan hrisel ngei ang. Khawvela zirna in hmasa ber chu chhungkua a ni a, faina chungchang hi chhungkua atangin tun hun atang hian inzirtir tan ila, chhungkua atangin Sikulah, Sikul atangin khawtlangah, khawtlang atangin Ramah, chutichuan faina kan hlenchhuak thei ang.

 Bairabi hi kan khua, kan in, kan ta a ni a, a bawlhhlawh i phal suh ang u!

____________________________________

(Kum 2017 All NGO leh SDC buatsaih Bairabi khawpum huap Faina Hapta Article inziahsaka lawmman pahnihna lakna a ni)