Rev. Dr. DAVID K BERNARD HI TUNGE? - by Jacky Chhakchhuak
Baton Rouge, Louisiana ah November 20, 1956 khan Elton leh Loretto Bernard-te inkarah alo piang a. Hun reilote hnuah Kohhran rawngbawlna avangin Port Allen, Louisiana ah an pem lut a. Bernard nu leh pate hi UPCI Missionary hna chelh lai mekte an ni. A unaunu Karen chu 1959 khan a piang a. An chhungkua chu Hammod, Lousiana ah insawn lehin chutah chuan Kohhran an phun nghe nghe a ni. Chumi hnuah chuan Korea rama Missionary hnathawk chhunzawm tura tirh an ni a. Korea ramah an kal hma lawk hian an zinkawngah chhiatna (Accident) an tawk a. Thla engemawzat chu an rawngbawlna a tikhaihlak a ni.
Korea Ramah
Seoul, South Korea ah Kum 1965 anihin an chhungin an pem lut ta a. Hetih lai hian David Bernard hi kum 8 mi chauh ala ni. Seoul, South Korea hmuna UPC rawngbawltu sulsutu hmasaber an ni hial a. Kum 20 lai mai UPC Kohhranah hian Missionary hna an lo chelh tawh bawk. Korea rama an kalna tur zinkawngah hian harsatna an tawk leh hlauh mai a. An chhuanna lawng (ship)-ah chuan kangmei a chhuak a, a puak hman lek lek hial a ni. Kum 1970 khan an chhungkua chu U.S ramah kum khat chhung chawlh an hmang a. An fate chu school kal turin Baton Rouge-a an chhung hnai Mitchells-i hnenah an hnutchhiah a, chutihlai chuan a nu leh pate chu rawngbawlin an chhuak leh a. Kum 1971 ah Korea ramah an kir leh a. Kum 1972 ah a unaunu Julie chu alo piang a. High School, kum hnih chiah a hmabak tawh tihah Hanni Foreign Language Institute ah leh UPC Bible College-ah te chuan English subject a zirtir thin a ni. Kum 1974 khan Seoul Foreign School-ah a Graduate a. Heta a kallai hian student council president a ni a, Seoul Foreign School Award a dawng bawk a ni.
College Hun
Kum 1974 ah kum 17 a nihin Rice University a kal a duh avangin Houston, Texas ah a insuan a. Hetihlai hian Irvington Pentecostal Church ah kum 4 chhung a lawi a, chanvo a neihte chu; Thalai President, Naupang Sunday School Zirtirtu, Bible Study teacher leh College and Career Sunday School teacher-te a ni. Permian Oil Corporation ah Accounting clerk hna a thawk a, Houston University ah Accounting instructor hna a thawk tel bawk. Kum 1978 ah Bachelor of Arts magna leh Mathematical Science zir chhuakin a Graduate a ni. Financial Executives Institute Award a dawng bawk.
A Graduate hnu chuan Austin, Texas ah Dan zir turin a awm leh a. University of Texas School of Law ah a lut a ni. Hetihlai hian UPC of Austin ah kum thum chhung a inkhawm leh a. Chanvo a chelh leh nual mai a, chungte chu; Youth Minister, Puitling Sunday School Zirtirtu, Missions Dept. Secretary, Outreach Director, home Bible Study Teacher leh Trustee te an ni. University a kal lai hian hna a thawk leh nual bawk a, chungte chu; salesman, bookkeeper, law clerk leh Austin Community College ah Bookkeeping instructor hna a thawk bawk a ni.
A Final Year, 1980 ah chuan Marble falls hmunah, Pastor Hazel Frusha uapna hnuaiah Revival Speaker a ni a. Dan a zir lai hian Kohhranah a inhmang thuk em em tawh a. Kar (week) 11 chhungin vawi 21 Pathian Thu a sawi tlangpui thin a ni. Kum tawp lamah chuan Rawngbawlna lama kal chhunzawm turin kohna a dawng ta a.
March 1981ah chuan UPCI hnuaiah Ministerial license a dawng a. May thlaah chuan Texas University ah Doctor of Jurisprudence a zir chhuak leh a. Award chi hrang hrang; Texas Law Review, Order of the Coif leh UT Chancellors a dawng bawk a ni. June ni 6 ah chuan Austin nula Connie Sharpe-i chu nupuiah a nei a. An inneih hnu chuan Jackson, Missisippi ah rawngbawlna tan tak tak tawh turin an insawn ta a ni.
Jackson, Missisippi
Jackson College of Ministries, Missisipi ah kum 1981 atanga tanin kum 5 lai a thawk a, instructor-in kum khat a thawh hnuah kum 4 chhung vice presiden ah a kaisang a. Wesley Biblical Seminary ah kum khat chhung Greek a zir a ni. A nupui pawh JCM School of Music ah kum 1984 khan a graduate a. Kum 1981 ah kum 24 mi a nih laiin a lehkhabu ziah hmasak ber ‘In Search of Holiness’ tih chu anu puihnain a chhuah (published) a ni. Oneness mi leh sa lehkhaziak chhuah hmasakber a ni hial a ni. Kum 1983 khan ama irawm chhuak ngei ‘Oneness of God’ chu a chhuah leh a, he a lehkhabu hi World Aflame Press chhutah chuan hralh chhuah tam ber ala ni. Kum 1984 ah Harvard University symposium ah Oneness Pentecostalism paper a present a ni. A fa hmasaber Jonathan chu November 14, 1985 ah alo piang a. Kum 1986 ah kum 29 mi a nihin El Salvador, Netherlands leh Yugoslavia-ahte rawngbawlin (missions trip) a fehchhuak a ni.
St. Louis, Missouri
St. Louis, Missouri UPCI Gen. HeadQuarter office ah full time in Editorial Division ah kum 1986 atanga tanin kum 6 chhung he hna hi a chelh a. Hetih hunlai hian United States chhung leh ram pawnah rawngbawlin a chhuak fo thin a ni. UPCI Parliamentary Committee ah kum 1987 ah a lut chho a. Pentecostal Studies Society ah Oneness Pentecostalism paper a present a ni. Bernard chhungkua hi St. Louis a an chen lai hian, a nupui Sis. Bernard chu Florissant Valley Apostolic Church ah Choir Director a ni a, Gateway College of Evangelism ah Music Theory a zirtir bawk a ni. An fa pahnihna chu September 24, 1988 ah a piang a ni.
Austin, Texas
Kum 1992 ah Austin, Texas ah an insawn a. Chutah chuan Kohhran (New Life Church) an phun a ni. An fanu Lindsey chu June 16 ah a piang a. Associate Editor nihna kum 9 chhung a chelh leh a,kum 2000 ah banna a thehlut ta a. Heta a ban hnu hian Urshan Graduate School of Theology, St. Louis ah Founding President atan appointment a dawng a. Kum enge maw chen chhung chu UPCI Committee leh Board ah te chanvo a nei nual bawk a, chungte chu; Minister Appeal Council,Texas District Sunday School Committee, Texas District Board, Board of Publication, Parliamentary Committee leh General Board te an ni. November 2002 ah South Texas District UPC Superentendent tura thlan a ni. Vawiin ni thlenga a lehkhabu, booklet leh lehkhabute (pamphlet) a chhut chhuahte chu 750,000 a chuang tawh a, tawng chi hrang hrang 36 a lehlin a ni. Ram 72 ah te rawngbawla zin chhuak tawhin continent paruk ah zirtirna a pe tawh bawk. U.S rama state 50 ah te chuan rawngbawlin a zin chhuak vek tawh bawk a ni. U.S Writes, Editors and Poets Who’s Who ah leh Who’s Who in Religion ahte a hming tarlan a ni a. Kum 2005 ah University of South Africa ah M Th. in New Testament a zo a ni. Hemi rual hian Doctor of Theology (D Th) a zo bawk. October, 2009 a General Conference ah General Superintendent atana thlan a ni.
_______________________________
_______________________________
Source :
upci.org
https://agapeworldwide.wordpress.com
Comments
Post a Comment