TUNGDING LEH RAWH U
Galatia 6:1-2 Unaute u, mi sual eng pawh a tih lai phawkin awm sela, nangni thlarau mite u, “Thlemna ka tawk ve dah ang e,” tia inveng tha chungin chutiang mi chu thuhnuairawlh takin tungding leh rawh u. In ritphurhte chu inchhawk tawn rawh u; chutichuan, Krista dan thu chu in zawm a ni ang.” He thu hi Tirhkoh Paula’n Galatia rama kohhranhote hnena a thawn a ni a. Krista dan thu zawm dan awlsam deuh mai, ke penchhuah har tak si, pawimawh em em bawk si chu kohhranhote hnenah hian a hrilh a ni. He thu hi vawiina kohhranhote hian kan nunpuia, abik takin Thlarau miten kan ngaih pawimawh a tul hle. FEL FAMKIM LO VEK KAN NI Mihring kan ni a, kan famkim lova, tumah reng hi tha famkim reng kan awm lo. Pathian mithmuhah ngat phei chuan mi fel famkim reng kan awm lo a ni (Rom 3:10, 23; Thihriltu 7:20). Chutiang mi kan nih mek lai pawha fela min pawmtu, tling lo chung chung pawha min pawmtu chu kan Pathian Lal Isua hi a ni a. Kan damlai ni a tlak hma ngei hian Lalpa hian a duhzawng ...